Showing posts with label Хөгжилтэй. Show all posts
Showing posts with label Хөгжилтэй. Show all posts

Saturday, January 25, 2014

Хөгжилтэй

Манай 2 чинь кесерова хагалгаагаар төрсөн юм. Өөрсдөө тэрийгээ маш сайн мэднэ. Тэгтэл нөхрийн дүүгийн эхнэрийн тухай бид ярьцгааж байлаа.
Охин:
-Ээжээ, Өөнөө аниа дүлж төрөх юмуу хагалуулж төрөх юмуу?
Би:
-Дүлж төрөх байхаа. Гэхдээ бие нь муудвал хагалаад л хүүхдийг нь авчихна.
Хүү:
-Дүлж төрнө гэж бөгсөөрөө дүлж гаргах юмуу?
Би бантсандаа,
-Тийм ээ. Гэтэл хүү,
-Та бас дүлээд гаргачихгүй юугаа хийж байсан юм гэнээ.
+++++++++++++++++++++++++++++++++++++++++++++++
Манай ээж хулганаас их айдаг юм. Хүү эмээгээ жижигхэн хиймэл үсээр айлгачихжээ. Эмээ нь огло үсрээд орилсон юм байна л даа. Тэгсэн хүү эмээгээ ингэж айсан гэж үзүүлж байгаан. Эхлээд ердийн аа гэж орилж босч үзүүлснээ одоо удаашруулаад гэснээ "аа-аа-аа-аа" аймаар удаан хөдөлж үзүүлээд хүмүүсийн инээдийг бараад. Эмээ нь хүртэл дахиад үзүүл дээ дахиад үзүүл дээ гээд дахин дахин үзээд байх юм.
+++++++++++++++++++++++++++++++++++++++++++++++
Хүү ер нь их марзан л даа. Охин ванны өрөөнд нүүр гараа угааж байхад нь хүү араас нь сэмээрхэн гэтэж очоод ард нь солир хараад нүүр амаа мурийлгаад инээдтэй царай гаргачихсан зогсож байсан гэсэн. Охин тонгойж нүүр гараа угааж байгаад босч ирээд толинд гэнэт дүүгээ хараад цочиж орилсноо түс хийтэл инээгээд.
+++++++++++++++++++++++++++++++++++++++++++++++
 Нөхөр бас 2 хүүхэдтэйгээ хуйвалдаад намайг ванны өрөөнөөс гарч ирэхэд цочоох гээд хаалганы ард нуугдаж байж л дээ. Би яахав чөтгөр юм болохоороо гараа арчингаа 2 хүүхдийн харц марцнаас байдал биш байгааг мэдэнгүүтээ ванны өрөөнөөс мөлхөөд гараад ирсэн чинь намайг цочоох гэж байсан нөхөр өөрөө надаас цочиж муухай орилоод ккк.

Ойрд цагаан сар болох гээд сайхан байна шүү. Бууз иднэ, айл хэснэ, эмээ ээж хоёрынхоо цагаан сарын юмыг бэлдэж өгнө гэж бодохоор сайхан санагдаад байх юм.


Tuesday, June 25, 2013

Сургуулийн сонин сайхан

Намайг анх ирэхэд 5 хятад, 3 япон, 1 бангладеш, 1 шриланка тэгээд би нэмэгдээд байлаа л даа. 3 япон нь 3-уулаа мастер, нэг хятад мастер, би мастер тэгээд үлдсэн хятадууд бангла шриланктай бүгд докторын оюутнууд байсан юм. Тэгсэн чинь цувраад 2 япон, 2 хятад, 1 шриланка нь төгсөөд яваад өглөө. Ингээд би, 3 хятад, 1 бангладеш, 1 япон үлдвээ. Гэтэл докторын 2 хятад охин, мастерийн 1 япон оюутан хоёр энэ хавар төгсөж чаддаггүй дээ. Миний ойлгосноор paper-үүд нь ямар нэг сэтгүүлд хэвлэгдэж амжаагүй байгаа гээд хойшлуулчихсан. Аль дивангарт уг нь явуулсан юм билээ л дээ. Тэгээд одоо болтол таг чиг. Нөгөө 2 докторын хятад охидууд бараг уйлах нь ээ. Бүүр нэг хоол унднаас гарсан хүмүүс л яваад байна энд. Би л нэг хөгжилтэй хөөртэй юм ярьж сэтгэлийг сэргээх гэж оролддог юм. Харин япон оюутан уурласан юмуу жилийн чөлөө авсан юмуу ирэхээ байсан. Арай ч сургуулиа хаяна гэж баймааргүй юмаа.
Манай лабын судалгааг хүнд гээд тэр юмуу эсвэл япон оюутнууд graduate school-д сурах дургүй болсон гэсэн сүүлийн үеийн хандлагаас болсон юмуу манайд японоос оюутан элсэхээ байсан гэсэн, ялангуяа докторт. Шинэ хүн ирдэг ч багшийн шаардлагад хүрдэггүй ч юмуу ерөөсөө шинэ хүн авахгүй байгаа миний л ирсэн сүүлийн 2 жилд /Япон оюутнууд уг нь ирээд уулзаад л байдаг юм/. Тэгэхээр энэ лабын хамгийн отгон нь би байгаан.
Манай лаб чинь их сонион. Уг нь инженерүүд байхгүй юу. Гэтэл судалгаа нь болохоор микробиологи. Тэгсэн мөртлөө микробиологийн судалгааны лаб биш. Тэгэхээр элсэж орох гэсэн инженер background-тай оюутны хувьд бол тэс өөр судалгаа санагддаг юм шиг байгаан. Бусад лаб факультет болохоор дүүрэн япон оюутнууд японоор шаагилдаад л байна. Харин манайх болохоор нэг ч япон оюутан байхгүй болохоор японоор ярих хэрэг байхгүй /тэгээд би япон хэл сурахгүй байгаан гэж худлаа яриад яахав тиймээ/.
Лаос охин бас туршилт нь дуусахгүй туршилтын өрөөндөө амьдарч байна гэсэн. Ганцаараа биш л юм байна гэж бас тайвшраад байгаа юмаа би ккк. Гэснээс кофегоо ихдүүлээд байх шиг байнаа. Нөхөр явахдаа 200 гр кофе авч өгсөн нь аль хэзээний дуусчихсан. Тэгээд нэтээр захиж авбал хямд байдаг юм байна нэгмөсөн 2кг-г авчихая гэсэн чинь нөхөр ухаан алдаж унах гээд байх юм. Thesis-ээ бичиж дуусгахад 2 кг хүрэх юм шиг санагдаад. Аан нээрэн манай найз "Үс чинь сэгсийгээд, нүд чинь бүлтийгээд хоол унднаас гараад, нойр чинь хүрэхээ байгаад ирэхээр диплом чинь болж байнаа гэсэн үг шүү. Миний найз тэснэ шүү" гэсэн шдээ ккк. За за тэсэхээс. Манай хүү хирагана үсгээ үзээд дууссан биш гадаа гарахдаа ээждээ зурвас үлдээж байгаан "Мама дайсуки" /Ээждээ хайртай гэж орчуулах уу/ гэж бичээд харвасан сумтай зүрх зурчихсан байна лээ. Аав нь харснаа ээждээ хайрын захиа өгөхтэйгээ болчихжээ миний хүү гэнээ. За за ямар ч байсан монгол ч бай япон ч бай нэг бичиг үсэг сураад зурвас бичихтэйгээ болно гэдэг чинь тиймээ.

Tuesday, June 11, 2013

Хавирга

Лабораторт юм хийж байтал утас дуугарлаа. Аваад хартал хүүхдүүдийн сургуулиас залгаж байна. Санаа зовсон гэж яаваа. Яахаараа хичээлийн цагаар ярьдаг байнаа. Бушуухан аваад ярьтал хүүгийн багш байна.
-...күний ээж мөн үү. Танай хүү... гээд  нэг юм яриад уналаа. Би ойлгодоггүй ээ.
-Яасан гэнээ, би ойлгохгүй байнаа гэсэн чинь "Түр хүлээгээрэй. Эгч нь энд байна" гээд удалгүй манай охинд утсаа өгчихлөө. Бүр манай охиныг хүртэл дуудчихаж, яасан юм болоо гэтэл охин утас авснаа,
-Байна уу ээж. Дүү хавиргаа хугалчихсан гэнээ.
-Юууууу???? Яахаараа хавиргаа хугалчихдаг юм бэ? Яаж байгаад хугалчихсан юм бэ? Би ухаан алдах шахаад орилж гарлаа.
-Мээдкү. Тоглож байгаад л хугалчихсан юм байлгүй.
-Юу гэнээ? Яаж тоглохоороо вэ? Дүү чинь одоо хаана байна. Би яг одоо очлоо гээд халаадаа тайлаад шидэж байтал охин,
-Тэгээд 120 иен төл гэж байна.
-Юу? Хавиргаа хугалчихсан байж яахаараа 120 иен төлдөг юм бэ?
-Халбаганых нь үнэ нь гэнээ. Маргааш ирэхдээ авчраарай гэж байна.
-Дүү чинь юугаа хугалсан гэнээ?
-Хоол иддэг төмөр халбагаа хугалчихсан гэнээ. Багш нь тэгээд тань руу ярьж байна. Намайг дуудаад орчуулж өг гээд байна.
-Өө. Еэ ашгүй дээ. Халбага хугарсан юмуу? За ашгүй ашгүй.
-Та яагаад халбага хугарахад баярлаад байгаан?
-За за багшдаа уучлаарай төлье өө гэж байна гээд хэл. Очоод ярья.

Нэг муу төмөр халбага хугарсны төлөө хичээл дундуур ярьж л байдаг сүртэй сүртэй гэхэд дэндүү сүртэй хүмүүс шүү гэж бодсоноо гэнэт ганцаараа үхтлээ инээлээ. Халбага хугарахад ингэтлээ баярлана чинээ санасангүй явлаа.

2013-06-11 Япон. Токио

Tuesday, December 18, 2012

Эрэгтэй хүн өвдөлт даахдаа муу

гэдгийг би бол зүгээр л туршилт хийж баталж байна шд энд. Манай хүн болбоос ган болд мэт бие хаатай хэзээ ч эмнэлэг домнолог явж байгаагүй хүн чинь энд эмнэлэгт хэвтээд хагалгаа магалгаа хийлгээд ёстой үзээгүй юмаа үзэж байна. Яаж азаар миний хажууд энд сайн сайхан газар байгаа дээрээ өвдсөн юм гэж ч бодох шиг. Монголд байсан бол халуураад өвдөөд байхад тэр чигээрээ диван дээрээ хэвтсээр байгаад үхэх байсан биз. Яагаад эрэгтэй хүн эмнэлэг явах ийм дургүй аймхай болчдог байнаа. Би бүтэн 7 хоног үглэж байж сүүлдээ шөнө унтаж чадахаа байгаад өвдөлтөндөө шаналаад ирэхээрээ аргагүй намайг дагаж эмнэлэг орж байгаа байхгүй юу, тэгсэн өнөө олгой нь аль хэдийн хагарчихсан ч байх шиг. За тэгээд хагалгааны дараах 3 хоног бол манай хүн зүгээр л өлгийтэй маамуу болсон шүү дээ. Ам руу нь хоол халбагадаж бие засуулж хувцас хунарыг нь сольж бүх юмыг нь хийж өгч 3 өдөр сахилаа. Чи одоо юун сүртэй юм бэ, олгойны хагалгаанд ингэж байгаа юм чинь над шиг 2 удаа кесерово хагалгаагаар хүүхэд гаргасан бол яах байсан юм, яг ийм оёотой онгорхой гэдэстэй дээр нь нэмээд хөхөнд чинь сүү орж чинээд дээр нь нэмээд бас нэг улаан нялзрай юм авчраад өгчихнө шдээ гэсэн чинь чи битгий хүн үхэх гэж байхад аймаар юм яриад бай л даа гэнээ хахаха.
За за дараа тухтай бичье. Одоо сургууль дээр илтгэл тавих ёстой. Хүүгээ босгож аваад чирээд явлаа. 

Monday, November 19, 2012

Өвлийн өвгөн, Санта Клаус, бэлэг

Дээр үедээ зохиолч Болор-Эрдэний бичсэн шинэ жилийн бэлэгний тухай уншаад нээрэн хэрэгжүүлбэл зүгээр ч юмуу ухааны юм бодлоо. Хоёр хүүхэддээ шинэ жилээр тэртэй тэргүй л бэлэг өгдөг юм чинь учир утгатай өгье, ээж аавынхаа үгэнд сайн ордог ч юмуу нэг тийм сайн байвал Санта Клаус ч юмуу Өвлийн өвгөн ч юмуу хүссэн бэлгийг нь авчирч өгдөг гэж хэлье гэж сэтгэлээ би чинь. Тэгээд хүүгээсээ асуусан юмаа
-Миний хүү ёолкоор ямар бэлэг авмаар байна?
-Чипс. Манай хүү тэр үед 2 настай байсан болохоор энэ бол боломжийн хариулт байв. Нөхөр бид хоёр бие биен рүүгээ ирмэлцээд дотроо болж байна ухааны юм бодлоо. Охиноос асуув.
-Миний охин ёолкоор өвлийн өвгөнөөс ямар бэлэг авмаар байна?
-Ордон
-??? Ямар?
-Хүүхэлдэйнийх шиг ордон
-Аан за за. Нөхөр бид хоёр дэлгүүрээс хүүхэлдэйн байшин тоглоом аваад өгчихвөл болох юм байна гэж бодлоо.
-Хүүхэлдэйний байшин уу? Тийм тоглоом уу?
-Үгүй ээ. Тоглоом биш. Жинхэнэ ордон. Би дотор нь амьдарна. Миний орыг нүүлгэж оруулж өгөөрэй.
-Тийм том юм бол чиний өрөөнд багтахгүй шд.
-Би жинхэнэ ордон яриад байхад чинь юун өрөөн дотор багтахгүй юм яриад байгаа юм бэ. Мэдээж ордон чинь өрөөн дотор багтахгүй шд. Би жинхэнэ ордон яриад байна.
Нөхөр бид хоёр шууд хүссэн бэлгийг нь авч өгөх бодлоо хаяцгаав. За за хүүхдүүдээ өвлийн өвөө нь хүссэн бэлгийг чинь бол өгч чадахгүй юм байна, та хоёр өгсөн бэлгийг нь л аваарай. Ингээд энэ явдал өнгөрч жил жилийн ёолкоор хүүхдүүд өвлийн өвөөгийн өгсөн бэлгийг нь л авдаг уламжлал хэвээр үлдэв. Харин энэ жил нөхөр бид хоёр бас л 2 хүүхдээ баярлуулчих санаатай хүссэн бэлгийг чинь өгье гэвэл юу хүсэх вэ гэж битүүхэн тандав. Эхлээд гол проблем болсон охиноосоо асуув. "Шинэ iPad, эсвэл надад өөрийн гэсэн компьютер хэрэгтэй байна л даа". Нөхөр бид хоёр бие биен рүүгээ нээх том хараад л "Заа заа, юу ч гэсэн өвлийн өвгөнд хэлээд л үзье" гэлээ. 8 настай охины хүсч болох л бэлэг байна л даа. Дараа нь хүүгээсээ асуулаа /6 настай/.
-Миний хүү бэлэг өгье гэвэл ямар бэлэг авмаар байна?
-Машин
-За. Ямар машин? Удирдлагатай машин уу, эвлүүлдэг Легоны машин байвал зүгээр юмуу?
-Биш ээ жинхэнэ унаад явдаг машин хэлээд байхад чинь юун тоглоомон машин яриад байгаан бэ? гэж авдаг байна шүү.
За больё чи минь зүгээр. Мөрөөрөө л байя. Дахиж хэрэгт дурлаж элдэв дээдийн юм асуухаа больё.

Thursday, November 8, 2012

Сонин сайхан...

Би гэдэг хүн чинь реактороо гашилгаж хаячихаад гавъяа байгуулсан хүн шиг багшаас шинэ хөрөнгө нэхээд л бахархалтай нь аргагүй сууж байнаа. Үгүй одоо яахав дээ туршилт амжилтгүй болоо л биз. Багшийн өөрийнх нь хэлсэн "Та нар энд туршилт амжилтгүй болохоос битгий ай. Та нар ийм туршилтыг эх орондоо хийж чадахгүй учраас баян газар байгаа дээрээ боломжийг ашиглаж ав. Алд алд дахин алд, харин алдаанаасаа суралц" гэсэн үгийг нь бамбай болгочихсоон сайхан. Хөөрхий үйлийн лайтай багш маань за би нэг үйлдвэр лүү явж хөрөнгө олж ирье дээ гэчихсэн л сууж байна лээ. Аймаар завгүй хүн шдээ уг нь.
Нөхөр ирсэн. Ирэхдээ бөөн паян. Онгоц нь аль 3:30-д буучихаад байхад чинь 7 болоод байхад ирдэггүй ээ. Уг нь цаг гарангийн дараа л ороод ирдэг байхгүй юу. Тэгсэн гэдэс нь өвдчихсөн үхэж байсан царайтай амьтан арай гэж ирдэг байна шүү. Яасан гэсэн, нисэхийнхээ урьд орой нь душёнктой будаатай хуурга идчихэж. Шөнөжин гэдэс нь сонин дуугарч хоноод өглөө босохоос авахуулаад хатгаад унасан юм байх. Тэр чигээрээ гүрийгээд онгоцондоо суучихсан чинь нислэгийн турш хэдэн үйлчлэгч хүүхнүүдийг сандаргасан гэнэ. Онгоцноос буухад үйлчлэгч нар нь эмнэлэг дуудаад өгье гэхээр нь гадаадаас халдварт өвчин тээж ирлээ гээд тусгаарлачихаж магад бушуухан эхнэр хүүхдийнхээ барааг харъя гээд татгалзаад шууд тэр чигээрээ наашаа зүтгэчихсэн гэнэ. Ирснээсээ хойш 3 хоног шөнөжин халуурч гэдэс рүү нь аймаар хатгуулж өвдөхөөс өөр шинж тэмдэггүй, юу ч идэхгүй 6 кг турж, 4 дэх өдрөөс нь арай гайгүй болж халуурахаа больж хоол унданд орж гэдэснийх нь өвчин алга боллоо.
Манай найз манай 2 хүүхдэд хоёр яст мэлхий бэлэглэсэн юмаа. Өнөөхөө манай 2 чинь бараг өвөртөлж унтдаг байхгүй юу. Заримдаа савнаас нь гаргаад газар тавьчихсан байдаг юм. Тэгсэн чинь манай хүн нэг удаа 00 орчихоод явж байхдаа "Миний хүү энийгээ газраас ав. Аав нь харахгүй гишгэчихнэ" гэсэн чинь охин "Өө энэ аав гуай чинь хоёр гурав хоног хоолгүй байцан чинь ухаан санаа нь самуураад амьд амьтан ч харахгүй гишгэж алдаг болоо юу" гээд үглээд унадаг юм даа. Манай 2-ын хэл амны паян дуусахгүй юмоо.
Манай найзыг яст мэлхий авчирч өгөх сургаар өнөө 2 чинь цаг хараад хүлээгээд суучихлаа. Ээжээ одоо яаг хаана явж байгаа бол гээд л. Би метроны буудлаас найзыгаа тосч аваад гэрт хаалгаар дөнгөж ороод ирсэн чинь манай хүү эгчийгээ дуудаад "Аниа аа, яст мэлхий ороод ирлээ" гэж үү. Санаа зовмоор. Ядаж ээж найзтайгаа ороод ирлээ гэж хэлж болно доо.
Аав нь яст мэлхийнд нь аквариум авч өгөөд өнөө гурав чинь тэрийгээ тохижуулж яст мэлхийгээ хийх гээд ванны өрөөнд бөөн бужигнаан болж байлаа. Аав нь хүүд "Ээжээсээ төмпөн гуйгаад аваад ир". Хүү над дээр ирснээ "Ээж, аав таныг айлаас төмпөн гуйгаад ир гэнээ".

Friday, October 12, 2012

...

Охин харь гаригийн хүнтэй кино үзэж сууснаа,
-Хэн анх энэ харь гаригийн нисдэг таваг гэж ярьсан юм болоо?
Хүү,
-Лам.
Охин:
-Яагаад?
Хүү:
-Өө тэд нар чинь юу ч ярьж мэдэх улс гэнээ хахаха. 

Tuesday, October 2, 2012

Хөгжилтэй ярианууд

Ойрд манай гэрт болсон ярианууд.
Хүү:
-Чи ингэж уншдаг. Эр-тээ урь-дын ца-гт гэж удаан уншдаг.
Охин:
-Тэгвэл чи өөрөө уншиж чаддаггүй биз дээ.
Хүү:
-Би чалчаа болохоор унших хэрэг байхгүй ээ.
.....

-Ээжээ, энэ аниа намайг хичээл хий гээд зодоод.

-Битгий хов зөөгөөд бай.

-Би хов зөөгөөгүй ээ. Болсон процессийг яриад байна шдээ. Та одоо ойлго л доо.
....
Охин:
-Би монголд очоод усан гахай юмуу туулай авахаа болилоо. Харин зараа авдаг юмуу?

-Яагаад?
-Хэтэрхий эгдүүтэй болохоор би биеэ барьж чадалгүй базаад алчихаж магадгүй. Харин зарааг бол базаж чадахгүй шд. 
Хүү:
-Хөөе чи тэгвэл миний гөлөгнөөс хол байгаарай.
...
Манай хүү их янгууч юм л даа. Тэгсэн нэг удаа "Аймаар өргөс зоогдчоод аймаар өвдөөд байна" гээд болдоггүй. Бараг нүдэнд харагдахгүй юман дээр янгуучлаад байгаа нь ойлгомжтой байлаа. Тэгээд аваад өгөх гэсэн чинь өнөө өргөс нь хэтэрхий жижигхэн болохоор би олж хардаггүй ээ. Тэгсэн хүү "Таны хараа улам муудаад байгаа юмуу даа. Ийм аймаар өргөс хүүгийн чинь биед зоогдчоод байхад л харахгүй байгаан" гээд үглээд унадаг байна шүү.
...
Байхгүй ардуур манай 2 зодолджээ. Зодолдохоороо аймаар дуу чимээ гаргадаг байхгүй юу. Би бүр хажуу айл, гудамжаар яваа хүн амьтнаас их санаа зовдог юм.
-Та хоёр муудалцаж зодолдоо юу?
-Энэ чинь диваны ардуур хичээл хийхгүй гэж нуугдаж орчоод. Би бүр арай гэж чирч гаргалаа шд.
-Пээ тэгвэл та хоёр ч ёстой аймаар орилолдож чарлалдсан юм байна даа тийм үү.
Хүү:
-Та байгаагүй нь ч болсон. Байсан бол ёстой айсандаа ухаан алдах байсан юм. Бид хоёр тийм аймаар байсан.
Яанаа хүн амьтан юу гэж бодсон болоо. Ёстой байгаагүй нь ч болж.  
....
Манай хүү цэцэрлэгийнхээ багш нарт "Манай аав Тоторо" гээд гэдсээ бүдүүн болгож үзүүлсэн гэсэн. Багш нар нь савж унаад аавыгаа цэцэрлэг дээрээ авчраарай гэсэн гэнээ.
....
Цэцэрлэгийн багш нь хэлж байна.
-Танай хүү зүгээр үед бид нарын ярьж хэлж байгааг маш сайн ойлгоод байгаа мөртлөө буруу юм хийчихээд намайг болохгүй гэхээр "Би монгол хүн. Япон хэл мэдэхгүй" гээд японоор хэлээд байх юм. Түүнийг хэлэхийг нь болиулж өгөөч.
 ....

-Танай хүү бүх биеэ шавраар бүрхчээд зоомбий гээд ангийнхаа хүүхдүүдийг араас нь хөөгөөд.
-Тэгээд яасан?
-Бид нар бүх хувцсыг нь тайлж байгаад зүлэг усалдаг шүршүүрээр шүршиж угаасан юм.
Гэртээ ирээд чи тийм хэрэг хийгээд тэгэж угаалгаа юу гэсэн чинь,
-Намайг ёстой яг машин угааж байгаа юм шиг угаадаг байна шд манай багш нар.

Wednesday, September 5, 2012

Addiction

Түүнд би анх тийм сайн байгаагүй юмаа. Бусад хүүхнүүд ялангуяа хуучин ажлын ахимаг насны эгч нар түүнийг харангуутаа бүр унан тусна. Ялангуяа гадаадад сургууль соёл төгсөж ирсэн хүмүүс түүнийг элдвээр магтаад л. Тэр ч гадаадаас дөнгөж ирсэн гоё сайхан хувцас хунартай хачин ганган амьтан л байдаг байв. Тэр үед нь би "За яршиг аа. Нэг муу хар юмны төлөө..." гэж боддог байлаа. Бүр заримдаа суугаа ажилтай эгч нарын биеийн чилээг нь сайн гаргаж өгдөг нөхөр юм байна даа гэж шоолон боддог байлаа. Ингээд яахав дээ, хүн гэдэг чинь их саваагүй юм болохоор би түүнтэй учрахаар шийдэв. Нэгэнт хэрэгцээ юм болохоор олдоц ихтэй нялуун хулхины гаруудтай хэрэгцээгээ хангаж явсан болохоор яг төгс сайхан гэж бусдын магтаад байгаа энэ нөхрийг үзэхээр шийдсэн юм. Нэг их зориг зүрх ч шаардаагүй ээ. Харин анхны удаа гэдгээ хүмүүсээс нуухаар л шийдэж байсан юм даг. Хичнээн залуу жаахан байсан ч гэсэн юм үзээгүй амьтан гэж хүнд хэлүүлмээргүй санагдсан юм шиг байгаан.
Анхны учрал маань миний бодсон шиг сайхан байсангүй. Хүн бүр тийм байсан байх гэж бодож байна. Бид хоёрын анхны учралаас хойш бараг 10 жил өнгөрчээ. Түүнээс хойш би түүнтэй байнга уулзаж учирдаг болсон. Өдөр, сар, жил ирэх тусам түүнийг ямар сайхан болохыг мэдэрч эхэлсэн. Алга болчихоор нь араас нь хайж гүйнэ. Энд тэнд тааралдвал түүнд мөнгө хайрлахгүй. Түүнийг гэртээ авчирч нөхөртэйгээ танилцууллаа. Эхнэрийх нь толгойг эргүүлээд байгаа хар юманд ямар ч эр хүн сайн хандахгүй тийм биз дээ. Тийм л юм болсон. Дараа нь би жирэмсэн болж хүүхэд гаргасан 2 удаа. Тэр үед л бид хоёр хэсэг хугацаанд холдсон байх. Мэдээж жирэмсэн эсвэл хөхүүл жаахан хүүхэдтэй эмэгтэй хүн түүнд таалагдахгүй байлгүй дээ. Ямар л олиг байв гэж. Хүүхдээ харж баясаад би түүнийг хэсэг хугацаанд мартсан байсан. Хүүхэд томорсны дараа би эргээд ажилдаа ортол түүнтэй халз тааралддаг байгаа. Тэгээд л ахиад л түүнд дурласан, хуучны дурсамж сэргээд л. Өдөр болгон, бүр заримдаа өдөрт 5 нахидаг болсон. Бие хөнгөрөөд л, сайхан болоод л бөөн эрч хүч амтагдаад л. Сайхан шүү.
Одоо би өнөө шоолон боддог байсан ажлын эгч нар шигээ түүнд үнэхээр сайн, бүр түүнгүйгээр байж чадахгүй болтлоо дурласан байх юм. 

Tuesday, September 4, 2012

Нөхөр бид 2-ын яриа

Нөхөр монголд байгаан. Нээрэн энэ facetime гээч чинь яасан сайхан эд вэ тээ. Skype энэ тэртэй харьцуулахад гацнаа нэг байхгүй юм. Нөхрийн дүү нар нутагтаа эхнэр жирэмсэн эхнэрүүдээ дагуулан ирж эхнээсээ төрцгөөж байгаа юм. Манай хүн дүүгийнхээ шинэ хүнийг эргэж очиж л дээ. Тэгээд орой нь над руу ярьж байнаа.
-Тулгын шинэ хүн нь овоо уйлдаггүй сайн хүүхэд байна лээ.
-Тийм үү. Манай 2 ч гэсэн уйлдаггүй л байсан шд.
-Тийм билүү. Би бага байсныг нь бараг санахгүй юм.
-Тэгэлгүй яадгийн, чи биш би бараг ганцаараа өсгөсөн юм чинь.
-Би хайччихсан байсан юм?
-Чи ажил гээд л өглөө 7-д босоод гарч яваад шөнө 12 цагт л ирдэг байсан шд.
-За тийм дээ. Манай 2 том болчихсон чинь жаахан хүүхэд хөөрхөн харагдаад байх юм. Сая Тулгын хүүхдийг хараад нялх хүүхэд чинь ийм жаахан байдаг билүү гэж бодлоо шд. Ямар ч эгдүүтэй юм. Үнэр танар гэж байнаа байна. Манай 2 хажууд нь динозавр юмаа. Ерөөсөө хоёулаа нэг шинэ хүн бодно байгаа, намайг очихоор.
-За гуцаа гуц.

Thursday, August 30, 2012

Хаалгаа цаанаас нь хаа

Хүү охин хоёр эрвээхэй барьдаг баатрууд болоод тор авахуулсан юм. Дэлгүүрээс ирэнгүүтээ өнөө тороо бариад гарцгаалаа. Тэгээд бараг цагийн дараа хүү хаалга онгойлгосноо нэг гартаа тороо чирчихсэн их л баатарлагаар,
-Ээж! Би сэми барьсан. Одоо гэртээ тэжээнэ.
-Хаалгаа цаанаас нь хаагаадах даа.
-За гээд хаалгаа хаагаад гадаа хэсэг байснаа гэнэт ойлгов бололтой дахиж онгойлгоод,
-Ээ ээж, би оръё л доо.

Friday, July 20, 2012

Кайф

Та нар ер нь юунаас кайф авч эсвэл юугаар стрессээ тайлдаг вэ? Хэт их хичээл хийгээд залхаад өөрийгөө сэргээмээр санагдаад эсвэл нээг их том ажлын ард гарсны дараа нэг тийм кайфтай юм хиймээр санагдаад байдаг юм, та нар бас тэгдэг байх.

Monday, July 16, 2012

Хүүхдүүдийн яриа

Мартахаасаа өмнө эндээ бичиж хадгалж авъя. Дараа өөрсдөд нь уншиж өгнөө.
Манай хоёр нэг өт тэжээгээд байсан гэж хэллүү? Өнөөх нь үхэж миний санаа амарч манай хоёр гарч оршуулчихаад орж ирэв ээ. Тэгсэн аав руугаа залгаад ярьж байнаа.
-Аав, бид хоёрын өт үхчихсэн. Бид хоёр тэгээд оршуулсан.
-Хаана?
-Хүн олохооргүй найдвартай газар булсан байгаа гэж хүү их маадгар хариулав. Тэгсэн охин,
-Манай өт нүдээ ингэж бүлтийлгээд амаа ингэж ангайгаад "Ө" гээд үхчихсэн шд ааваа.
Аав нь охиноо харснаа,
-Өө ямар хөөрхөн үхдэг өт вэ?
Охин дүүдээ тоо зааж өгч байгаа юм. "Чамд 6 чихэр байжээ. Ээжид 2-ыг нь надад 2-г нь өгчихвөл чамд хэд үлдэх вэ?". Хүү бодож бодож байснаа,
-Дөрөв
-Үгүй ээ чи 2-ыг нь ээжид өгөөд дахиад 2-ыг нь надад өгчихсөн байгаа шдээ.
-Үгүй ээ би чамд чихэрнээсээ өгөхгүй. Чи эртээд надад бас чихэрнээсээ өгөхгүй л байсан даг. Тэгэхээр надад 4 л үлддэг байгаа юм биз дээ.
Шууд Буратино санаанд ороод би түс хийтэл инээд алдав. 

Thursday, July 12, 2012

Бүрүүшка, Тэдди, Симба гурав

Өнөө гурвынх нь зургийг оруулчихая.


Хаашаа ч явсан энэ гурвыгаа авч явна, үгүй ядаж Бүрүүшкаг бол заавал авч явна. Ямар сайндаа манай ээж "Наад Бүрүүшка чинь эмээгээс нь дээр юм. Япон Солонгос яваад үзчих юмаа" гэж байхав.

Wednesday, July 11, 2012

Амьтанд хайртай хүүхэд

Манай хүү амьтанд жигтэйхэн хайртай дуртай болчихлоо. Ёстой нөгөө Гилийн хатан эгчийн хүү жоом алах гэхээр эвий эвий гээд алуулаагүй гэдэг шиг л болж байна.
Энд нохой муур тэжээж болохгүй байранд байгаа тулдаа л тэсч байнаа манай хүү. Монголд очингуутаа ямар ямар амьтан авч өг гэчихвээ. Нохой, муур, усан гахай, хулгана, гүрвэл, цох хорхой, гахай за байж арай могой гээгүй байгаа даа.
Ямар ч амьтан харахаараа хөөрхөн юм бэ иш чааваас иш чааваас гээд л хэлээ хазаад л. Бүр аалз харчихаад баацайсан хөөрхөн байна тэжээвэл яасан юм гээд байгаа чинь одоо энгийн үзэгдэл биш биз дээ. Энд японы бага сургууль чинь хүүхдийг багаас нь байгальтай ойр байлгаж байгалийн ухааны анхан шатны ойлголт өгүүлэх гэж баахан цэцэг тарьж хорхой тэжээх даалгавар өгчихнө. Тэгэхээр хүүхэд хорхой шавьжнаас айдаггүй амьтан алдаггүй, цэцэг тарих дуртай, тарьсан цэцгийг хайрладаг, амьтанд хайртай их сайн хүүхэд болж хүмүүждэг юм байна шдээ. Ер нь ганц япон ч гэлтгүй бусад орны бага сургууль ч тэгдэг байх. Монголынхоо сургуульд шууд хуулаад нэвтрүүлчих юмсан.
Манай хоёр гаднаас есөн шидийн хорхой шилэн сав дүүрэн түүж орж ирээд намайг ухаан алдуулж унагаах шахсан шд. Яах гэж байгаан гэсэн чинь бүгдийг нь тэжээнэ гэнээ. "Өө за ээж нь өдөрт хорхой соруулж байх юм байна л даа. Аав чинь тэгвэл Монголоос ирэхгүй шүү" гэсэн чинь за яахав гэсэн. Манай хүн чинь хорхой шавьжнаас үхтлээ айдаг байхгүй юу. Сургуульд ч гэсэн цэцэрлэгт ч гэсэн ингэж хорхой түүлгэдэг юм билээ. Тэгсэн өчигдөр нэг том ногоон өт барьж орж ирээд тэжээнэ гээд эгчтэйгээ сав суулга хоол унд бэлдэж гүйлдээд бөөн хөөр боллоо шд. Тэрийгээ тэжээсээр байгаад эрвээхэй болгож авах юм гэсэн. Нэг хорхой тэжээдэг том сав авч өгөхөөс. Тийм сав нь энд хаа сайгүй дэлгүүр болгонд байдаг юм хүүхдүүдийг хорхой тэжээ гээд. Бас нэг удаа "Ээж энийг хар даа" гэхээр нь харсан чинь хоёр гар овоолон дүүрэн жижигхэн бөөрөнхий хар юм. Тэгсэн эндэхийн нэг чийгний хар хорхой байдаг юмаа, айхаараа бөөрөнхий болчихдог тэр байж уу. Ёо ёо ёо шууд нуруу зарс гээд хаяаачээ гээд чарлаж байгаа юм чинь.
Манай хүү чинь унтахдаа Бүрүүшка, Тэдди, Симба гурвыг заавал өвөртөлж унтана /хэн болохыг нь нэрнээс нь таньж байгаа биз дээ/. Аль нэг нь байхгүй бол орилоод хайгаад гүйчихнэ. Сүүлийн үед нэг гүрвэлний цуглуулган тоглоом авсан, өнөө хэдэн гүрвэлүүд нь амьд юм шиг энд тэндгүй, юм юмны доороос гарч ирээд дотор зарс хийлгээд байх юмаа. Эрэгтэй хүүхэд ер нь багадаа ийм л байдаг байх даа. Хариад ямар ч байсан нохой усан гахай хоёр заалттай авах л болж байх шиг байна аав нь авч өгнө гэж байна лээ.

Tuesday, May 15, 2012

Захиа аваад аа...

Хоёулаа уулзая, үгүй ээ болзоё ч гэх юмуу dating хийе гэдэг захиа аваад. Хэн гэж үү мэдээж би бишээ миний 8 настай охин япон бандиас захиа аваад аа. Хахаха. Өчигдөр хичээлээ тараад ангийнх нь нэг банди хүргэж ирсэн юм. Наадах чинь яагаад чамайг дагаад яваад байгаан гэсэн мэдэхгүй гээд өнөөхөө орхичоод шууд гэртээ орчихсон, би өнөө хүүг нь харсаар байж хаалгаа хаачихалтай биш "Нэр чинь хэн бэ, гэр чинь ойрхон уу, би ...гийн ээж байна, танилцахдаа таатай байна" гээд л явууллаа. Охин ч яахав дүүтэйгээ цуг гадаа тоглоно  гээд гараад явчихсан, би гэр орноо цэвэрлээд ухнатаж байтал хаалганы шуудангийн хайрцагт шар хийтэл нэг юм хийчихээд яваад өглөө. Газ ток усны билл л ирж байгаа юм байх гээд тоосонгүй, дараа нь харин онгойлгоод үзтэл цэнхэр уутан дотор нэг дэвтэр, нэг харандаа /Японы сургууль нээрэн балын харандаагаар бичдэг юм/, нэг хөөрхөн хэлбэртэй баллуур, нэг тоглоомон шүрэн хүзүүний зүүлт, нэг жижигхэн дугтуйтай захиатай гарч ирлээ. Мэдээж охинд ирсэн нь ойлгомжтой, өрөөнд нь оруулаад тавьчихлаа. Орой манай 2 ч орж ирлээ. Чамд захиа ирсэн гэсэн чинь тоож байгаа ч юм алга, нэг онгойлгож харснаа өө нөгөө өдөр ирдэг хүүхэд өгсөн байна гэнээ. Захиагаа уншаач гэсэн чинь за дараа болъё гэж байна. Тэгээд би ч хоол хийнэ гэж гүйгээд мартчихаж. 
Орой юм уншаад сууж байсан чинь охин хүрч ирснээ "Ээж, дэйто гэж юу гэсэн үг юм?" гэж байна. Хаана байна тийм үг гэсэн чинь захиагаа авчирч үзүүллээ. Балын харандаагаар маш нямбай бичиж зүрхээр зурж чимэглэсэн захианых нь сүүлийн өгүүлбэр дотор дэйто /dating гэдэг англи үгний японжсон хэлбэр, болзох гэсэн утгатай/ гэдэг үг тууж явна шүү. Наад захиа чинь ер нь юу гэж байна гэсэн чинь "Өө яахав дээ, хоёулаа маргааш уулзая гэсэн байсан, бас ямар нэг юм таалагддаг гээд байна лээ, юу ч юм бүү мэд, бас юунд дуртай вэ гээд асуугаад байна лээ, тэгээд энэ дэйто гэдэг юмыг хийе гэсэн байна" гэж авдаг юм. Хахаха. 
Би заримыг нь сайн ойлгохгүй байна, маргааш Савад үзүүлээд асуучихая гэнээ. Өө миний охин өөр хүүхдэд үзүүлж ёстой болохгүй шүү. Ээж нь дараа орчуулаад өгье, өөр хүнд л битгий үзүүлээрэй гэж захилаа шд. Аягүй бол охидууд бөөн яриа гаргаад өнөө хүүг нь олны өмнө эвгүй байдалд оруулчихвал яана. Манай хүний энэ захианы тухай сонсчихоод түнтэгнэж уурлаж байгааг ээ. Хэхэхэ. 

Tuesday, May 1, 2012

Дахиад нэг хүнийг саваагаад

Ухаан алдаж унах шахах юмаа энэ хүмүүс нээрээ. Хэхэхэ. Инээд хүрээд байх юм. Өнөөдөр нэг Малайз охиныг саваад унагаачихсан. Япон хэлний хичээл дээр тийм болохоор тэгдэг ийм болохоор ингэдэг гэдэг өгүүлбэр үзэж байлаа. Багш улирлаар жишээ аваад, Японд 4 сар болохоор сакура дэлгэрдэг, 6 сар болохоор бороо ордог гэв. Оюутнууд ээлж ээлжээр хэлсээр яваад миний ээлж ирэхээр нь "Манай улсад 10 сар болохоор цас ордог, 12 сард -30 хүрдэг" гээд хэлчихсэн чинь хажууд сууж байсан Малайз охины 2 нүд нь орой дээрээ гараад ам нь ангайгаад "Хасах гуч аа?" гээд анги дүүрэн орилоод. Ёо миний цочсон гэж. Японоор ч асуугаад англиар ч дахин дахин асуугаад, нүд ам хоёр нь хүний гар орчихмоор яг ижилхэн хэмжээтэй болчихоод над руу хараад байх юм. Энэ халуун орны хүмүүс нээрэн хэцүү ч юмуу. Цас үзээгүй, хасах хэм гэж төсөөлөх ч үгүй, цасан хүн зур гэхээр чадахгүй. хэхэхэ. 

Tuesday, February 14, 2012

Зодоон

Охин хичээлээсээ нүүр ам нь улайчихсан ирлээ. Яасан гэсэн зодолдсон гэнээ. Ангийнх нь нэг охин эртнээс л хажуугаар нь гарахдаа шүргээд түлхээд л байдаг байсан гэнэ. Тэгсэн өнөөдөр тэсэхээ байгаад дэлбэрсэн юмуу хаашаа юм гэнэт миний охиныг түлхэж унагаад "This is Japan. No English. No Mongolia" гээд хөл рүү нь өшиглөсөн гэнээ. Тэгэхээр нь манай охин үсэрч босч ирээд өнөө охиныг чинь хананд шахаж багалзуурдаад "I'm Mongolia. English OK! Mongolia OK! Ok?" гээд хөл рүү нь эргүүлж өшиглөөд тэгснээ хоёулаа үсдэлцэж аваад орилж чарлалдаад зодолдоод ангийнхан нь сандарч салгах гэж хашгиралдаад дундуур нь орж ноцолдоод бүр ангиасаа хальж корридортоо гараад ангийнх нь тал хүүхдүүд багшийгаа дуудахаар гүйлдээд "Сэнсэй. Иттэ иттэ. Хаяакү Хаяакү"/Багшаа, ирээрэй хурдлаарай/ гэж сургуулиараа нэг хашгиралдаад хажуу ангийн хүүхдүүд ангиасаа шагайж харцгаагаад бөөн юм болсон юм байхаа. Багш нь хар хурдаараа гүйж ирж зодооныг нь салгаад ангийнх нь хүүхдүүд өнөө япон охиныг багшдаа ховлоцгоогоод багш нь өнөө охиныг манай охиноос уучлал гуй гэсэн чинь гүрийгээд гуйхгүй байсан гэнэ. Тэгсэн багш нь уурлаад захирлын өрөө рүү чирээд аваад явсан гэнэ. Манай охин шарандаа баахан уйлаад ангийнхан нь аргадаж бөөн юм болсон юм байхаа. 
Охин жаахан англи хэлтэй, багштайгаа ойр зуурын юмаа  бас ангийнхаа ганц хоёр англи хэлтэй хүүхдүүдтэй харьцаад ойлголцоод байдаг юм, түүнд нь атаархсан юм болов уу.  Эсвэл японоор ярихгүй болохоор нь уур нь хүрээд арьс өнгөний үзэл гаргаж байгаа санаатай юмуу болов уу. 
Монгол руу аавд нь "Охин өнөөдөр сургууль дээрээ зодолдсон байнаа" гэсэн чинь шууд өөдөөс "Миний охин дийлсэн үү?" гэнээ. Ёооё энэ эрчүүдэд тэр эцсийн үр дүн нь л сонин болохоос хэнтэй яагаад зодолдсон энээ тэрээ нь огт сонин биш байдаг юм байх даа.  

Monday, February 13, 2012

Ойрын сонин сайхан

Японы засгийн газар хямралд ороод байна уу, эсвэл ер нь хааяа ингэдэг нь яг над дээр таарчихав уу. Миний сарын стипендийг 8000 иенээр бууруулчихаж. Ганц минийх биш л дээ, Японы засгийн газрын тэтгэлэг буурч байгаа тул ADB бас ингэж бууруулж байгаа юм гэнэ. Сургуулиар дүүрэн гадаад оюутнуудын шуугиан. Олон жил мастер докторт сураад сурчихсан хал оюутнууд "Өө тэгдэг юм. Байнга буурсаар байгаан. Анх бүр сард 200,000 иен байсан гээд бод доо" гээд нэг их цочирдож хүлээж авахгүй байгаан. Мань мэтийн шинэковууд нь учиргүй сэтгэл санаагаар унадаг байна шүү. 
Нэг франц оюутанд хямдхан хүнсний дэлгүүр зааж өгсөнд баярласандаа нулимс унагаах шахлаа шд хөөрхий минь. Ирээд ганц сар л болж байгаан. "Би анх ирээд юмны үнэнд нь шоконд ороод. 4-хөн ширхэг жүрж 5 евротой тэнцүү үнэтэй байхыг хараад олигтой идэх юм ч худалдаж авч чадахаа байчихсан байсан юм. Ийм дэлгүүр байдгийг мэдээд Японд амьдарч болмоор санагдаж байна" гэж байгаа юм чинь. Ёоо энэ Японы үнэ хөөрхий франц охиныг хүртэл шоконд оруулсан байна шүү. Би ганцаараа шоконд ордоггүй л юм байна хихихи.
Нөхөр Монгол руу 7 хоног аялан тоглолтоор явчихсан. Нөгөө хэдэн солонгосууд нь өдөр шөнөгүй утасдаад замын зардлыг чинь бүх зардалтай нь төлье ганц 7 хоног ирээд туслаад өгөөч гээд гуйгаад байхаар нөхөр онгироод алга болоод өгсөөн. Цагаан сарын өмнө ажил хөөцөлдөөд явж байдаг та хэдээс өөр хүн байхгүй дээ гэсэн зүгээр зүгээр гээд л алга болж өглөө шд. Ирэхэд нь бөөн ном дэвтэр захисан улс л үлдлээ. Энд чинь элементийн дэвтэр байхгүй, хэдэн дэвтэр захиж хүүгээ гарыг нь зүгшрүүлэх дасгал хийлгэх, бас охиноо монгол хэлийг нь давтуулж бичгийн хэвийг нь алдуулахгүй байлгахгүй бол япон хэл гэж тэмдэг үсэг бичсээр байгаад бичгийн хэвгүй болох нь.
Нээрэн бас машинд дайруулахаа шахаад. Ямар азаар энэ японы машинууд нь ногоон гэрлээр ухасхийгээд дайрдаггүй юм, тэр тулдаа л зүгээр өнгөрлөө. Монголд би ийм авир гаргасан бол шууд бялцга болохгүй юу, еэ бурхаан. Машин руу харсан гэрэл улаан байхаар нь хүний гэрэл ногоон байгаа гэж бодоод дугуйтайгаа зам руу ороодохсон чинь шууд машины ногоон асчихдаг гэж байна шд. Бантсандаа замын голд зогсоод буцаад дугуйгаа чирээд ухардаг байгаа. Хоёр талаас ганц ч машин хөдлөхгүй намайг харцгаагаад байгаан. Тэгээд хичнээн ногоон гэрэл нь асаастай байгаа ч намайг буцаад замын цаана гарсан хойно хөдөлцгөөж байгаа байхгүй юу. Тийм хөөрхөн шдээ хайр хүрмээр. Ёо монголд ногоон гэрэл асаа л бол машинууд уралдаанд орж байгаа юм шиг л хаазаа гишгээд ухасхийцгээнэ шүү дээ, юун тэр зам гарч амжаагүй явган хүн энээ тэрээ бол хамаа байхгүй. Эдний бас нэг анзаарууштай сайхан юм нь, явган хүний ногоон гэрэл асч дуусаад нилээн удаж байж машины ногоон гэрэл асдаг юм. Манайд шууд автоматаар зэрэг солигддог шд тээ. Зам гарч амжаагүй явган зорчигчид дайруулж үхээрэй гэж байгаа юмуу хаашаа юм.
За их юм бичиж чадахгүй нь ээ. Би уг нь их завгүй байгаа байхгүй юу. Ойрд нэт ороогүй байж байгаад шагайсан чинь миний 10 жилийн дурсамжийн маань эзэн Whitney Houston нас барчихсан байх юм. Миний үеийнхний 10 жилийн дурсамж шууд сэргэнэ дээ дууг нь сонсвол. Ум ма ни бад ми хум. Хойд төрөлдөө сайн ханьтай учраарай гэж ерөөе. 

  

Thursday, February 9, 2012

Цэцэрлэг сургуулийн асуудал

босч ирлээ дээ хөөрхий. Өчигдөр охины сургуулиас залгаж байна. Англи хэлний багш нь хэлмэрчлэн хичээлийн эрхлэгч нь ярьж байнаа. Ёо би ёстой пал хийгээд явчихдаг байна шд. Манай өнөө сахилгагүй саваагүй охин маань ямар нэг хэрэг тарьчихаагүй байгаа л гэж бодлоо. Тэгсэн харин дүүг нь асууж байна. Би анх охиноо оруулж байхдаа дүү нь бас удахгүй танай сургуульд орно гэж хэлж байсан юм. Дүү нь манай сургуульд орно гэлүү, төрсөн өдрийг нь хэлээд өгөөч гээд цаашаа хоорондоо баахан юм ярьж байснаа "Уучлаарай энэ хавар 1-р ангид зөвхөн 2011 оны 4 сарын 1-нээс 2012 оны 3 сарын 31-ны хооронд 6 нас хүрч байгаа хүүхдийг л авна. Танай хүү 6 сард 6 нас хүрэх болохоор энэ жил сургуульд орж чадахгүй нь киндергарденд л явах хэрэгтэй юм байна" гэж авдаг юм даа. 
Ёо би ёстой уурандаа цус харвахаа шахдаг байна шд. Миний хүү одоо болтол цэцэрлэг олдохгүй гэртээ сууж байгаа юм. Тэгээд энэ 4 сараас 1-р ангид оруулъя тэр болтол яаж ийж байгаад аргалъя гэдэг шийдэлд хүрчихээд өдөр хоногийг арай ядан гэртээ өнгөрөөж байгаа байхгүй юу. Эдний цэцэрлэг нь 2 янз байдаг юм. Нэг нь аав ээж нь завгүй айлын хүүхдийг нь харж өгдөг зүгээр өдөр өнжүүлэх. Энэ нь зүгээр л хооллоод тоглуулаад унтуулаад асраад л байж байна. Цагийн сонголттой, ихэвчлэн өглөөнөөс орой хүртэл заримдаа нэмэлт төлбөрөөр хагас сайн өдөр харж өгч болно. Төлбөрийг тогтоохдоо аав ээжийн цалин дээр үндэслэнэ. Жишээ нь, аав ээжийн жилийн орлого 2 сая иен орчим байвал сарын 20,000 иен орчим, 3 сая бол 30,000 гээд л явж өгнө шүү дээ. Би ажил хийдэггүй ядуу оюутан байнаа гэсэн чинь уучлаарай стипендээ орлого гэж тооц гэж байгаан. За за жилийн яг 2 сая иен болж байна тэгвэл цэцэрлэгийн төлбөр нь сарын 20,000 иен болох нь байна уу гэсэн чинь, уучлаарай аавын цалинг нэм гэнээ. Аав нь ажил олдохгүй байнаа удахгүй ажилд орох байхаа гэсэн чинь, уучлаарай танай нөхөр завтай л байгаа юм байна шд, хүүхдээ өөрөө хараг, цэцэрлэгт авахгүй гэсэн шүү дээ. 
Нөгөө нь болохоороо яг сургууль шиг форм өмсөөд автобусаар зөөлгөөд хичээл мичээл хийдэг сургуулийн өмнөх боловсрол олгодог kindergarten. Тэр нь болохоор аймаар үнэтэй бас бүгд хүүхэд нь дүүрчихсэн гээд авахгүй гэдэг юм. Ёо төлбөр нь хэд гээч. Хаалгаар нь анх орох төлбөр буюу entrance fee нь 5 настай хүүхдийнх 60,000 иен, тэгээд сарын төлбөр нь хоол унд, ном дэвтэрийн хураамж энэ тэртэйгээ нийлээд бараг 30,000 иен гэсэн. Намайг гадаад хүн гээд бүр арай илүүг ч төлж магадгүй гээд байсныг яана гээ тэр хотын захиргааны ажилтан. За дүүрч дүүрч, мөнгийг нь төлөөд хүүхдээ явуулъя гээд ойр хавийн бүх ийм цэцэрлэгээр нь очсон чинь бүгд 5 настай хүүхдийн анги нь дүүрчихсэн, орон тоо байхгүй уучлаарай гэж байгаа юм чинь. 
Тэгээд л миний муу хүү шоовдорлогдон үлдэж нийгэмших үйл ажиллагаанаас хоцрон гэртээ ганцаархнаа эгчийгээ хичээлээ тарж ирэхийг нь хүлээн уйдаж суудаг болсон доо аль 11 сараас хойш. Тэгсэн чинь одоо энэ муу сургууль нь хүртэл авахгүй гэж маяглах нь байна шд. Одоо миний хүү энэ 4 сараас сургуульд биш тэр киндергарденд нь орчоод зун 6 нас хүрээд ирэх жилийн хавар 4 сард арай гэж 1-р ангид ороод намар нь монголдоо 7 настай хүүхэд харьж очоод  дахиад 1-р ангид суух болж байна уу? Ядаж байхад эдний хичээлийн жил нь олноос онцгой, түмнээс тэс өөр, эсрэгийн эсэргүү хачин хуваарьтай, хавар 4 сард шинэ хичээлийн жил эхлээд дараа жилийн 3 сард төгсдөг юм. 
Үгүй ээ үгүй, би хүүгээ энэ хавар 4 сард 1-р ангид оруулмаар байна. Хотын захиргаан дээр очиж би гадаад хүн, нутагтаа очоод миний хүү үргэлжлүүлж сургуульд сурч чадахгүй болох гээд байна гэж уурладаг юм билүү.